Figlias dal silenzi

18.
Ti pedaleschas ordavant
regular e conscienzius
sco in’ura.
Quai dat fidanza
en mai mezza.
Ma cunzunt profund plaschair
da ma mover tras il vent.

 

17.
E puspè
va in di a fin
ed jau constatescha
che betg mi’entira raccolta
e chargiada sin il char.
Sto esser che mes vehichel
ha la faussa grondezza.

 

16.
Ils vegls uravan
Segner ans pertgira
da la ritgezza andetga.
Jau di:
Segner ma pertgira
da persunas che discurran
ma che na fan naginas dumondas.

 

15.
Èsi naiv
u èsi fluriziun?
Cun l’avrigl na san ins mai.
El spurla sias bravuras
sur ils tschareschers,
lascha naiver da sulegl
ed ans fa surstar.

 

14.
Sche mia brama bastass
giess jau ina saira
sin il con da las dialas
fermass mes fils
vid duas stailas
e faschess ballabaina
enfin la damaun.

 

13.
Jau sun ravgentada e trumpada.
Per che mia tristezza tschessia
stoss jau ir giuador a spass.
Mintga pass ma gida
da relativar.
Let it be.
Emblida.

 

12.
Las vatgas
guardan giudim il prà
en la naiv da mez october.
Na fan betg mucs.
Supportan en dignitad
mintgina per sasezza
e tuttina in muvel.

 

11.
Sche ti tiras flad e dormas
dasper mai
ed jau ma dasdel
dasper tai
sai jau che quai è patria
era en in letg ester
ed era lunsch davent da chasa.

 

10.
Pairers en flur
èn sco spusas pompusas.
Tschareschers en flur
èn spusas finas e noblas.
Mailers en flur
èn spusas cun vistas cotschnas - 
prontas.

 

9.
L’emprim eri mo duas,
lura 5, 10, 100, millis.
Vegnidas svelt or da la terra
en silenzi.
Networking
dapi adina.
Las mintgilettas da primavaira.

 

8.
La cuntrada brama la naiv,
di la glieud.
Uss è la naiv qua
ed ha cuvert la cuntrada.
Grev da dir
schebain la cuntrada è uss
cuntenta e satisfatga.

 

7.
La maioritad gudogna
en ina democrazia.
Ma ella n’ha betg adina raschun.
Mintgatant dovra
la maioritad temp
per chapir la differenza.
Temp pers?

 

6.
La via è la medema.
La stagiun è in’autra.
Lezza giada er’jau
sin la scarsola cun mes bab.
Ussa èsi stad
ed jau hai emprendì
dad ir cun velo.

 

5.
Cura ch’Adam ed Eva
han gì fatg ir enavos
la roda dal temp
eran els puspè en il paradis.
Stuain nus star qua
uss per adina,
èn els sa dumandads.

 

4.
I na dovra
betg pleds e betg ovras.
L’odur dal fain setg basta
per l’impuls da sfunsar
en regurdientschas.
E zac è qua
la tschigulatta chauda.

 

3.
Il chant da messa:
ina bellezza.
Ma a la giuvna avant mai
avess jau il pli gugent
tratg per ils chavels blonds.
In baterlim trasora
cun ses ami.

 

2.
Lain far la spassegiada
senza discurrer.
Per udir
il chant da la merlotscha.
Sias variaziuns
fan ch’ils sumbrivals da l’olma
vegnan fins. 

 

1.
El baterla
d’in cuntin
sco sch’i fiss da svidar la mar.
Quant lung
dastg’esser il silenzi
avant ch’el derschia vinavant
d’in puz a l’auter?