Maria Cadruvi

Schurnalista
Scolasta da Feldenkrais
Cussegliadra da logoterapia

Jau sun naschida l’onn 1949 a Ruschein e dapi il december 2009 stun jau puspè en mes vitg nativ en Surselva, ensemen cun mes um Andreas Joos.

Da 1967 enfin 1972 hai jau lavurà en in biro da viadi a Turitg ed a Genevra, sun viagiada bler per il mund enturn e sun era stada durant quels onns per emprender linguatgs durant plirs mais en l’Engalterra, en l’Italia ed en Spagna. Suenter hai jau lavurà passa 35 onns sco redactura e schurnalista tar la SSR (Societad Svizra da Radio e Televisiun) ed jau hai realisà numerusas emissiuns per radio DRS e cunzunt nundumbraivlas emissiuns en rumantsch per RTR (Radiotelevisiun Svizra Rumantscha).

Premis/distincziuns:
2005 Premi Cristal da la CRR (Cuminanza Rumantscha Radio e Televisiun - oz SRG.R) per l’emissiun da radio La Marella cun il titel „Ils suns e tuns dals pleds“ realisada cun Roger Willemsen e Flurin Caviezel.
2009 Premi da renconuschientscha dal chantun Grischun en undrientscha per mia „lavur da piunier multifara sco intermediatura da cultura en differentas medias, surtut tar Radio e Televisiun Rumantscha, e da l’activitad sco editura“.

Damai ch’jau hai – dapi l’onn 1982 – adina „mo“ lavurà en temp parzial sco schurnalista, hai jau gì la pussaivladad da ma scolar vinavant sin divers champs interessants e qua tras rimnar anc autras experientschas da vita. Uschia hai jau collavurà dapi l’onn 1980 en la chasa editura (Octopus Verlag) da mes um. Da 1997 enfin 2001 hai jau absolvì en la Toscana la formaziun sco scolasta da Feldenkrais (Certificate IFF International Feldenkrais Federation). Da 2006 enfin 2010 hai jau frequentà a Cuira a l’ILE la scolaziun sco cussegliadra da logoterapia (Nachdiplomstudium Höhere Fachschule in Logotherapie und Existenzanalyse nach Viktor E. Frankl). E medemamain a l’ILE a Cuira hai jau fatg tranter l’october 2007 ed il matg 2009 la scolaziun en „Wertimagination nach Uwe Böschemeyer“. Logoterapia n’è dal rest betg da scumbigliar cun logopedia. Logoterapia è art da viver. La constataziun centrala da la logoterapia sa numna: Il carstgaun è ina creatira a la tschertga da quai che fa senn.

L’entschatta 2010 sun jau ida „en pensiun“, almain quai che pertutga mia activitad schurnalistica tar la SSR. Jau vuleva anc ina giada cumenzar insatge nov – cun ina impulseria. Mia impulseria dat da tuttas sorts impuls. Dapli sut Intenziun, Offerta ed Actual.