Intenziun

Envers nagut essan nus uschè fidaivels sco envers nossas disas. I dovra buns motivs per midar ellas. Ma mintgatant vali la paina. Uschiglio continuain nus noss viadi tras la vita sulettamain sin „autostradas“ che nus enconuschain ordadora e che daventan cun il temp lungurusas e monotonas. Ed insacura sa dumandain nus forsa: È quai stà tut?

Sche nus essan cunzunt fidaivels a nossas disas e betg a noss talents, noss siemis e nossas ideas, lura na vegnin nus mai a savair ch’i dat sper las autostradas anc millis vias, sendas, trutgs e percurs che mussan a nus

• quant ritga ed interessanta che la topografia da la vita è
• quantas experientschas captivantas che nus savessan anc far
• quants pensums ch’ans spetgan.

Mintgatant dovri impuls d’ordaifer per daventar avert era per autras vias, per guardar cun auters egls, per sentir cun auters senns, per survegnir il curaschi da far e patertgar auter.

E mintgatant fai bain da pudair tancar tar insatgi auter ideas, forza e plaschair per continuar cun nova motivaziun la via da la vita, ina via en furma da spirala.

Mia impulseria è ina spezia da tancadi.