Offerta

Dapi blers onns offresch jau lavur dad autobiografia en pitschnas gruppas da trais persunas. Questa lavur n'è betg ina terapia, mabain in viadi captivant tras l'atgna istorgia da vita.

En mes repertori chattais Vus era dis d'impuls, saja quai per uniuns, gruppas d'interess, firmas u per persunas privatas che vulan p.ex. envidar amis ed amias ad in di particular.

Tar mia offerta sin mesira tutgan era cussegliaziuns individualas da logoterapia, p.ex. sche Vus giavischais dapli clerezza tar decisiuns persunalas, ubain sche Vus avais simplamain il giavisch da purtar dapli colur e dapli senn en Vossa vita.

En mia offerta sin mesira datti era "Feldenkrais sin mesira". Quai èn singulas lecziuns individualas en "Bewusstheit durch Bewegung", en las qualas Vus pudais emprender moviments che fan bain a Vus e che Vus savais far per Vus a chasa.

E per cas che Vus essas a la tschertga dad ina moderatura per ina occurrenza publica u privata - grazia a mia lunga experientscha professiunala sco dunna da radio sun jau gugent pronta da manar discurs u discussiuns ubain da metter ensemen per Vus in program p.ex. per ina saira culturala rumantscha.